Toleransi Umat Maagama ring Bali
Ring Bali sampun kaloktah krama Bali ritatkala ngamargiang swadarma saling asah asih sareng krama sane matiosan Agama utawi keyakinan ipun. Pinaka conto, ritatkala Umat Hindu ngemargiang Catur Bratha Payepian ring Rainan Nyepi krama Bali sane tiosan ring maagama Hindu, taler tinut nenten medal sajeronin pawongan wantah cihna hormat ring pamargin Rainan Nyepi sane kamargiang Umat Hindu ring Bali. Asapunika taler, conto sane tiosan ritatkala krama Bali sane maagama Islam, ngamargiang Hari Raya Idul Fitri sering kakantenan Pecalang sane kaloktah ring Bali sayaga dados cakra bala sareng krama Umat Islam sayaga mangdane parikrama Hari Raya Idul Fitri mamargi antar. Toleransi Umat maagama ring sajebag Bali sampun mamargi saking nuni. Wenten taler kacihnayang kampung-kampung Muslim sane sampun wenten saking Zaman Kerajaan ring Bali. Salueripun Kampung Bugis ring Denpasar punika taler kampung Muslim sane magenah ring Pasisi Ujung Karangasem. Krama Bali ring kampung-kampung punika sane dumun rumaket pisan paswitran ipun sareng Krama Bali sane tiosan punika taler ring Raja tur Kaluarga Puri. Ring zaman kadi mangkin, toleransi maagama ring Bali sayan becik riantukkan sampun kakaryanin wadah mawasta Forum Kerukunan Umat Beragama FKUB inggih punika organisasi sosial sane kawangun olih masyarakat kasarengin pemerintah sane matatujon ngarumaketan pasawitran sareng umat maagama saluwire ritatkala wenten kapiambeng prasida di gelis kabawosan tur polih pamargi sane satinut sareng umat maagama sami. Asapunapi sane sampun wenten ring Bali parindikan toleransi umat maagama becik pisan kaanggen conto ritatkala hidup ring masyarakat mangdane nenten wenten biuta nganining parindikkan keyakinan punika taler nyumbungan keyakinan utawi Agama sane pastika nenten wenten pikenoh ipun.
Enable comment auto-refresher