Daweg tigang rahina lintang, titiang malancaran ke Kintamani. Rikalaning punika, titiang manggihang wenten anak asu sane kabaos kuluk. Anake maosang asune punika asu Kintamani nenten wenten sane miara. Asu alit inucap becik pisan, meled titiang makta budal tur kapiara ring pakubon. Nanging titiang eling ring gatra indik rabies sane kapanggihang ring makudang wawidangan ring Bali. Silih tunggil wicara rabies inucap kapanggihang sangkaning ngambil asu liar utawi nenten wenten sane miara. Napi malih magenah ring wawidangan sane katarka zona merah rabies. Yaning selehin titiang, Kabupaten Bangli ngeranjing silih tunggil zona merah rabies ring Bali taler sampun kapanggihang wenten wicara positif rabies. Titiang rumasa jejeh yaning keni rabies, nanging titiang taler rumasa pedalem manggihang asu alit inucap. Risampune titiang matetimbang rasa, asu liar punika raris ambil titiang. Nanging sadurung kantos ring pakubon, asu liar inucap bakta titiang ke dokter hewan, katureksa kesehatannyane taler kapicayang vaksinasi rabies. Risampune kawedarang sehat olih dokter, raris asune bakta titiang kapakubon tur kagenahang ring kandang. Parindikan puniki kamargiang pinaka silih tunggil utsahan titiang nekes wicara rabies ring Bali. Santukan yaning asune inucap nenten kapiara becik taler nenten kakadangin kajejehin metu wicara rabies sane anyar. Titiang ngaptiang parindikan puniki prasida dados pakeleling kramane sami, yaning kayun miara asu mangda rutin kavaksinasi saha nenten kalebang.
Aktifkan pemuatan ulang komentar otomatis