Indonesia pinaka wangsa sane kawangun antuk makudang kudang suku, ras , budaya, miwah agama sane matiosan. Duaning kadi asapunika panegara Indonesia kasub antuk rasa toleransi. Utamanipun indik kahuripan maagama. Pluralisme agama ring Indonesia sampun sue riinan yening imbangang ring panegara sane lianan. Kerukunan beragama inggih punika kahanan paiketan patraning agama sane kadasarin antuk rasa toleransi. Ring patraning umat maagama mangdane mikukuhin kahuripan pasuka dukan malarapan sasanti saling asah, asih, asuh paras paros sarpanaya ngulati kahuripan sukerta santi. ketreptian miwah rasa toleransi puniki pinih mabuat mangdane panegara Indonesiane tetep ajeg. Yening maosang indik toleransi agama ring Indonesia akeh sampun mamargi sekadi sane sampun kaaptiang. Tuntunan indik kautaman rasa toleransi puniki pinih mabuat pinaka anggen ngrajegang panegara Indonesia druene. Indik ngupapira kerukunan beragama puniki patut kalaksanayang olih makasami sane daos warga Indonesia. Cutetne ngupapira indik ketreptian patraning agama wantah swadarman iraga makasami inggih punika pemerintah, Lembaga agama, parajana miwah angga utawi dewek soan- soang. Sane prasida kamargiang minakadi iraga dados warga Indonesia nenten dados ngasorang agama sane siosan, Numbuhang rasa toleransi antuk saling asihin patraning suku, adat, budaya, miwah agama. Saling wantu utawi mapitulung rikala wenten acara agama utawi hari raya ring agama sane siosan. Nenten mabinayan rikala mapitulung ring kauripan dados warga Indonesia. Setata ngajain miwah nuntun para pretisentana utawi sane kabaos generasi muda indik rasa masikian dados warga Indonesia mawit saking wewidangan kauripan makulawarga ngantos ka kahuripan maprajana. Cutetnyane iraga patut ngupapira ketreptian maagama ring panegara Indonesia puniki mangda prasida ngulati kahuripan sane santi tur panegara druene ajeg.
Enable comment auto-refresher
Ni Luh Eka Maylantari
Permalink |