Danu Batur Kintamani pinaka silih tunggil danu sane sampun kacemerin. Toyannyane nenten ening malih taler sampun nenten layak kainum. Toyan danune kacemerin olih kawentenan alat transformasi boat ring dermaga. Taler swagina petani sayur ring abing abing sisin danu sane setata migunayang obat-obatan investisida. Kadulurin antuk paripolah wargi sane ngentungang luu ring danune, anyudan limbah hotel penginapan, pasiraman toya anget, keramba jaring apung KJA . Pangaptin titiang pinaka generasi penerus mangda angganing pemerintahe prasida ngicen piteket ring soang-soang desa miwah sekolah-sekolah sa- wawidangan Kecamatan Kintamani utamannyane krama sane magenah ring wawidangan danu Batur, mangda prasida makarya ekoenzim sane keanggen nyomya toya danune sane sampun cemer. Punika taler mangda ring suang suang keluarga makarya 10 - 20 liter ekoenzim. Malarapan utsaha punika, toyan danune prasida mawali resik, tur ening ka jatimula. Angganing petanine taler mangda prasida migunayang pupuk organik miwah pola terasering ring sektor pertanian. Ring KJA prasida mikukuhang tata kelola nganutin daya dukung miwah daya tampung taler ngangge pakan be sane ramah lingkungan. Pemerintah taler prasida ngicen sanksi majeng ring krama sane nganyudang limbah miwah ngutang luu ring danune marupa hukuman pidana. Titiang pinaka warga krama ngaptiang mangda prasida toyan danune mawali resik, ening, asri tur ngulangunin. Bilih-bilih wawidangan Danu Batur sampun kamanggehang pinaka Batur Geopark lan obyek wisata, mawastu akeh tamiu manca negara sane rauh malancaran ke Bali. Ka pungkur wekas prasida nincapang perekonomian krama Bali makasami, nyujur kahuripan sane paripurna santa dharma. Punika mawinan iraga pinaka krama Bali patut ngupapira palemahan toyan danune, mangda nenten YEH DANU mauwah manados YEH MATA.
Enable comment auto-refresher
Nikadeksulisyadevi
Permalink |