Pinungkan Covid-19 ring jagate puniki ngwetuang panglalah sane akeh pisan. Silih tunggil panglalah sane karasayang pisan inggih punika ring sajeroning panglimbak ekonomi sane sayan nguredang. Meweh ngrereh pangupa jiwa, PHK tan prasida kakelidin, miwah sane tiosan. Duaning asapunika, para krama mangkin matetimbang pisan ri kala medalang jinah anggen sarahina mangda prasida irit yadiastun manados pait makilit. Rumasa meweh pisan manggihin krama sane olas asih ngicenin wantuan, mawinan sami keni panglalah. Krama ring panepi siring sane kaloktah antuk manyama braya taler meweh saling matetulung pantaraning krama. Mangda nenten akeh nelasang jinah anggen nglanturang kahuripan sarahina, krama panepi siring sane sadurungnyane sampun makehan nganggen kompor gas, mangkin mawali malih ngudusang pawaregan nganggen saang. Mawali nuluh tukad, teba, miwah tegalan mangda payu maajengan. Yadiastun leleh, nanging prasida ngwantu kahuripan sane meweh. Mawinan minabang kantun sue kawentenan puniki. Yening manahin malih, sayuakti sampun rikala mrana, wau eling mawali ring wana.
Aktifkan pemuatan ulang komentar otomatis