Sujatine pulo Bali inggih punika pulo sane sampun kaloktah ka duranegara duaning kawentenan budaya miwah tradisi sane becik, unik, tur ajeg lestari. Kawentenan tradisi sane akeh punika wantah saking kapracayaan kramane ring soang-soang desa pakraman. Imbanyane tradisi ring Kabupaten Buleleng sane nyakan ring margane wusan nglaksanayang Upacara Ngembak Geni, Tradisi Watangan ring Desa Trunyan, Tradisi Nyepi Segara ring Nusa Penida, Tradisi Matebusan upacara sane kalaksanayang ri kala wusan keni sengkala utawi kecelakaan miwah tradisi sane lianan. Malarapan indike punika, kari akeh kramane sane maosang Bali punika ribet duaning kawentenan tradisinyane sane akeh tur mabinayan ring soang-soang wewidangan. Akeh kramane maosang kenten, duaning ragane nenten uning unteng tradisi-tradisinyane punika wantah uning wastan tradisinyane kemanten. Tradisi Bali sane akeh punika sujatinyane madue tetujon ri kala nglaksanayang upacara utawi tradisi. Wenten taler sane maosang indik tradisi ring Bali punika akeh ngamedalang prabea. I raga patut eling ri kala nglaksanayang upacara punika wenten pat unsur yadnya inggih punika sreya, budhi, bhakti, miwah karya. Punika sane ngawinan krama Baline sami setata ngamolihang karahayuan. Malarapan antuk punika, i raga dados jadma Bali nenten dados maosang Bali punika ribet. Sujatinyane i raga patut bangga duaning madue tradisi sane akeh tur patut nglestariang budaya miwah tradisi Baline.
Enable comment auto-refresher