Basa lan Sastra Baline pinaka tetamian leluhur. Nanging sane mangkin, sapunapi kawentenannyane utamannyane ring para yowana? Kantunke para yowana Bali nganggen basa Bali ritatkala mabebaosan serahina-rahina? Manut Badan Bahasa, sane mangkin wenten 718 bahasa ibu sane sampun teridentifikasi. Saking 34 provinsi ring Indonesia, tercatat 25 bahasa daerah sane sampun terancam punah, 6 kabaosang kritis lan 11 bahasa sampun kabaosang punah.
Ring kota Denpasar utamannyane ring kalangan yowana akeh pisan kawentenan para yowana sane nenten ngawigunayang Basa Baline antuk mesadu ajeng berkomunikasi sareng timpal-timpal ipun. Pikobet puniki sangkaning kirangnyane kewagedan para yowana mabasa Bali. Kekirangan utawi keterbatasan rikala mabasa Bali puniki nenten ja lempas saking perubahan sosial lan budaya ring Kota Denpasar. Pikobet sane lianan inggih punika pola pikir masyarakat Denpasar sane cenderung ka negara barat, negara timur rumasuk Bali kaanggap tradisional. Nika mawinan patut kawentenan solusi mangda basa lan sastra Baline setata ajeg.
Ngrajegang basa lan sastra Bali prasida kakawitin saking manah soang-soang yowana. Yening nenten iraga para yowana pinaka generasi penerus, sira malih sane jagi ngrajegang basa lan sastra Baline? Mawinan Basa lan Sastra Bali puniki pinaka cihna jagat Bali sane sampun kaloktah nyantos ka dura negara. Santukan iraga para krama Bali wantah prasida ngadol utawi ngicenin basa, sastra lan budaya majeng ring para wisatawan. Nika mawinan, iraga para yowana mangda setata eling ring basa lan sastra Baline.
Sane mangkin sampun akeh piranti-piranti digital sane sampun prasida ngicenin paplajahan basa lan sastra Bali ring internet. Piranti punika prasida kaangen rikanjekan jagi melajah basa Bali.
Aktifkan pemuatan ulang komentar otomatis