Siap Sangkur
Summary
In English
In Balinese
Kacerita dugas pidan di Jembrana, ada jadma maadan I Tumtum. Ia ngelah sampi a akit. Dugas ia lakar n nggala di ring carikne, semengan ia luas ka abiane pacang ngejuk sampine. Teked di abiane, ia tusing nepukin sampine. Mailehan ia ngalihin nanging sampine tusing ada. Pagehan abianne tileh, tusing ada usak. Ia bingung ngenehang sampine. Di abiane ada punya kepuh gede lan tiing telung lingseh. I Tumtum lantas kema, di batan kepuhe negak masila tur masesangi. Jro panunggun kepuh, sampin titiange ilag iriki. Tulung patujuin titiang, dija ipun nongos. Yening kapanggih, titiang pacang ngaturin jro panunggun kepuh ketipat akelan maulam ayam. Mara keto ia masesaudan, saget mamunyi sampine di beten tiinge. Tunian, ada pang dasa klincak klincak ditu nanging tusing ada sampi. Mapan sampine suba tepuk, ia buung nenggala lantas malipetan mulih. Teked di pondok lantas ngae ketipat lan nampah siap anggon nawur sesangi. Siape kaguling. Disubane makejang lebeng, pejanga lantas di salange. Sanjane mara lakar aturanga. Buin kejepne teka pianakne uling malali, jemaka siap gulinge ento. Kibul siapne kagompes lantas magedi. Disubane sanja, I Tumtum makiken luas ka abiane. Dapetanga meonge nongos di batang salange. Suba pragat magegampil, ia majalan ngaba aturane ka biane. Teked di abian, ketipat lan ulam bantene pejanga di batan kepuhe. Ia lantas ngendihang api anggon nunjel menyan. Prajani ia tangkejut ningalin siapne idup tur malaib maimbuh tusing maikut. Sengangat sengenget ia matolihan menek, sing ada apa. Lantas ia ningeh suara uling kepuhe. Suarane ngerem tur ngrehgeh. Usan ngrehgeh mara ada suara terang. Eh cai Tumtum, cai tusing dadi naur sesangi ketipat mabe guling. Benehne bukakak siap to. Buina gulinge ento suba carikan krana ilang kibulne. Awake tusing nyak nampi, to krana buin urip awake ya. Pitui yen cai matamiu tusing dadi nganggon be guling numabungkulan, musti recah. Ento makrana I Tumtum buung naur punagi, buin nyumunin nganggon bukakak siap. Ento lantas di jagat Jembrana kayang jani jadmane tusing ada naur sesangi ketipat maulam guling. Buina siap sangkur sing dadi anggon ayam banten.
In Indonesian
Enable comment auto-refresher