Ida dane sareng sami, pamekas ring panureksa sane dahat kusumayang titiang. Bapak miwah Ibu panuntun sane wangiang titiang, taler para pamilet pacentokan Orasi Wiki Basa Bali sane tresna asihin titiang. Om Swastyastu. Maduluran manah hening nirmala, tan mari titiang ngaluhurang rasa angayubagia mantuka ring Ida Sang Hyang Widhi Wasa, sangkaning pasuecan Ida, mawinan titiang prasida masadu arep ring ida dane sakadi mangkin. Gumantinipun ngamiletin pacentokan Orasi ri sajeroning Wikithon Partisipasi Publik rahinane mangkin. Dumadak wekasan, pamargi kadi asapuniki sayan limbak kawentenannyane, wastu sida ngawetuang jagat Baline ajeg. Ida dane sareng sami, mungguing orasi sane jagi atur uningayang titiang mamurda Pendidikan Sane Becik Pinaka Piranti Nincapang Kualitas SDM Bali Ida dane sareng sami sane wangiang titiang, napi sane mawinan titiang ngambil murda kadi asapunika? Santukan akeh panggihin titiang, para yowanane ring Bali nenten polih pendidikan sane patut utawi becik. Indike punika sane mawinan SDM utawi sumber daya manusia Baline, meweh antuk polih gegaen utawi pekaryan sane prasida ngelimbakang ekonomi Provinsi Bali. Yening manut ring data Badan Pusat Statistik warsa 2021, persentase krama Bali sane nenten polih masuk utawi masekolah inggih punika 1,03 ribu jiwa utawi 24,04 , selanturnyane sane nenten lulus SD akehnyane 377,18 ribu jiwa utawi 8,83 . Saking data Badan Pusat Statistik punika, pamerintah miwah semeton Bali utamannyane mahasiswa sepatutnyane mautsaha antuk ngelaksanayang program-program sane prasida ngewantu krama Baline sane durung polih pendidikan sane layak utawi patut. Raris, program napi sane prasida antuk kalaksanayang? Ngiring sareng-sareng mapikeneh. Titiang pinaka yowana Bali, lakar ngemaang solusi utawi saran antuk Bapak miwah Ibu DPD Bali taler pamerintah sane dados penyambung lidah masyarakat, mangda setata prasida ngewantu ngicenin kaweruhan sane becik majeng ring semeton Baline sami. Saran sane kapertama, runguang utawi perhatiang kualitas lan kuantitas para gurune sami. Guru utawi tenaga pendidik pinaka kunci utama sane lakar ngajahin tur ngemaang kaweruhan majeng ring murid-muride. Yening upah, fasilitas tur akomodasi gurune nenten patut utawi durung memadai, punika prasida berpengaruh ring proses melajahe. Sane kapingkalih, fasilitas penunjang sekolah lan kelas sane patut kautamayang. Ritatkala proses melajah berlangsung, nanging fasilitas sane kaanggen durung lengkap, pastika guru sareng murid-muride mayus melajah utawi mengganggu proses melajahe ring kelas. Saran kapingtiga, icenin para yowanane sami antuk ngelaksanayang geginan sane positif ring sisi sekolah utawi program belajar di luar sekolah. Conto sane becik minakadi, ngalaksanayang miwah nyarengin pacentokan, ngamiletin program pengabdian masyarakat taler geginan sane mawiguna lianan. Mangda nenten melajah ring sekolah kemanten. Ida dane sareng sami sane kusumayang titiang, malarapan atur titiange sane lantang wawu, pacang kaaturang pacutetan asapuniki. Pamerintah miwah krama Baline nenten dados ngeremehang utawi memandang sebelah mata indik kaweruhane punika. Santukan saking pendidikan iraga prasida ngemolihang geginan utawi gegaen sane becik antuk nincapang kualitas SDM Bali sane durung ngelimbak. Taler para krama Baline mangda nenten kadalon ring kawibuhan sane wenten ring jagate mangkin, sane kabaos Revolusi Industri 4.0 . Ngiring iraga sareng-sareng ngewantu krama baline sane durung polih pendidikan sane becik malarapan antuk program utawi kegiatan sane positif lan bermanfaat. Kapinguntat, iraga sepatutnyane mulat sarira mangda eling ring angga, sareng-sareng ngalaksanayang swadharma agama antuk ngukuhang jagat Baline. Inggih, ida dane sareng sami sane banget wangiang titiang, wantah kadi asapunika titiang prasida matur ring galahe sane becik puniki. Suksma aturang titiang majeng ring ida dane sane sampun nyaksiang Orasi titiang puniki. Dumogi napi sane baosang titiang wenten pikenohnyane. Mantuk ring saluir kakirangan, lugrayang titiang ngelungsur agung rena pangampura. Pinaka pamuput atur, titiang ngojarang parama santhi. Om Santhi, Santhi, Santhi, Om
Enable comment auto-refresher
Gede Adrian Maha Putra
Permalink |