Nyen ane tusing nawang BASAbali Wiki? Ene website ane misi paplajahan unduk Bali. Mirib makejang sisyane yen ada tugas Basa Bali pasti mukak BASAbali Wiki. Uling kamus, plalian kata, kanti sesuratan mabasa Bali ada dini. Website ene masih sesai ngae lomba mabasa Bali madan Wikithon. Wikithon inggih punika wiki marathon utawi genah mapanampen unduk isu publik, ngortaang panepas ane paling cocok anggon nepasin pakeweh krama di gumine. Kramane nyidangn mapanampen, nincapang kawagedan mabasa Bali, buina maan pipis disubane menang. Ane paling penting, makejang isin kenehe unduk isu publik nyidang pesuang dini tur dingeha teken pemerintah.
Mula melah pesan tetujon Website BASAbali Wiki nenenan. Nanging patut kenehang bareng-bareng, apa ke di ada wikithon dogen nyidang mapanampen? Men yen topik utawi isu wikithon tusing karasaang baan kramane, kenken carane kramane mapanampen? Nah, yen saja mula BASAbali Wiki dot dadi platform ane nyidang dadi tongos kramane mapanampen unduk apa dogen ane ada di palemahane, tur nyidang nguningayang keneh kramane ka pemerintah, patut di website BASAbali Wiki ngae fitur Ngiring Masuara utawi ring basa Indonesia Mari Bersuara . Yen klik tombol Ngiring Masuara , ditu kramane nyidang nulisin isin kenehne unduk sakancan ane ada di palemahane, apa-apa dogen isu publik ane lakar katepasin, muah makejang ane lakar saduang ka pemerintah. Tusing ja tuah nulis, nanging ditu masih nyidang ngisinin foto, video, lokasi, muah adan dinas apa ane lakar katuju.
Contone yen ada ceglongan utawi jalan usak, ento nyidang ngae anak ane liwat nemu baya, apa buin yen liwat peteng-peteng. Krama ane nepukin unduk totonan nyidang nulis di fitur Ngiring Masuara . Ditu kramane nyidang masadu ka Dinas Pekerjaan Umum tur kalengkapin baan foto jalan ane usak. Jani tim BASAbali Wiki ane ngelah tugas apang sesuratan kramane di fiur totonan nyidang neked ka dinas-dinas.
Ada makudang-kudang pakeweh ane sai tepukin di jalan, nanging I raga tusing nawang lakar masadu kija. Paling-paling ngrimikang pemerintah di media sosial. Ento masih tusing ada gunane, pemerintah tusing ja nyak ngrepak nulungin. Nanging yen suba ada website BASAbali Wiki, dumadak ja munyin kramane bisa nganteg ka pemerintah. Cara keto yen panampen tiang. Dumogi ja BASAbali Wiki nyidang nuludulin keneh krama apang urati teken palemahan tur isu publik. Apang BASAbali Wiki nyidang masadok teken pemerintah unduk isin keneh muah panampen kramane. Pamuputne para krama miwah pemerintah nyidang bareng-bareng saling gisi ngae Bali sayan maju.
Punyan duren buahne ulung nglilik, Adep ka peken aji dasa tali, Mai tangen nampenin isu publik, Mesuang keneh di BASAbali Wiki.
Enable comment auto-refresher