Dewan juri lomba sane wanggiang titiang Tim BASAbali Wiki sane kusumayang titiang Taler ida dane sareng sami sane dahat tresna asihin titiang
Sadurung titiang nglanturang atur, ngiring ulengan pikayun melarapan antuk pangastungkara panganjali umat Om Swastyastu .
Pinih ajeng, lugrayang titiang ngaturang angayubagia majeng ring Ida Sang Hyang Widhi Wasa, sane sampun ngicenin titiang galah ring lomba Wikithon puniki. Suksma atur titiang majeng ring dewan juri miwah tim BASAbali Wiki sane sampun ngwacen orasi titiang puniki.
Pulo Dewata Bali inggih pinaka silih tunggil provinsi ring Indonesia sane kasumbung sangkaning bhaga pariwisata. Akeh wisatawan saking dura Bali utawi duranegara rauh ka Bali. Objek wisata lan palemahan sane asri ngawinang pulo Bali kasenengin olih wisatawan saking dura Bali utawi duranegara.
Sakewala wenten pikobet sane ngeranayang kerusuhan olih wisatawan ring gumi baline. Akeh wisatawan sane maparilaksana nenten patut sekadi ugal-ugalan ring margi lan nenten manut teken uger-uger lalu lintas Bali sane lianan. Parilaksana sane corah punika ngirangin keajegan sane sampun kajaga olih krama baline.
Pemerintah sepatutnyane tegas ngaryanin sanksi majeng ring wisatawan sane ngelanggar uger-uger lalu lintas. Wajib nyediaang fasilitas umum sane becik minakadi ojek lan mini bus gratis khusus ring pemerintah Bali mangda wisatawan punika nenten nyewa motor ring jasa rental. Program-program keamanan lalu lintas patut kalaksanayang olih pemerintah santukan ketertiban sane kautama ring gumi Baline puniki.
Asapunika sane prasida aturang titiang ring galah puniki. Dumogi napi sane kaaturang titiang prasida dados program kerja sane kautama olih calon pamimpin Bali 2024.
Titiang puput antuk parama santih Om Santih Santih Santih Om .
Enable comment auto-refresher