Om swastiastu Sapunapi gatra semeton sareng sami? Dumogi iraga sareng sami polih kerahayuan. Ring galahe sane becik puniki, lugrayang titiang jagi ngaturang papineh indik utsaha sane patut kalaksanayang olih calon pemimpin Bali ring warsa 2024.
Bali sampun kasub ring sajebag jagate tur sampun kaloktah ring Dura Negara, indik seni lan budaya. Taler Bali kabaos Pulau Dewata lan Pulau Seribu Pura. Nika mawinan para tamiu saking Dura Negara akeh rauh ka Bali, mapikayun mangda uning antuk kaunikan budaya Bali. Suwe galahe mamargi, akeh para tamiu saking Dura Negara sinalih tunggil Pura pinaka tatujon obyek wisata. Nanging sampun akeh kacunduk para tamiu saking Dura Negara, ngusak asik ketaksuan utawi kesucian Pura. Titiang panggih ring media sosial, wenten sane munggah ring palinggih, wenten munggah ring gedong meru lan sane lianan. Antuk punika, titiang pinaka Umat Hindu merasa sedih ring manah. Riantukan, pikobet punika dahat mabuat pisan. Ring galahe puniki titiang nunas majeng ring para pemimpin ring warsa 2024, mangda ledang ugi ngicenin uratian antuk pikobet sane dahat mabuat pisan puniki. Taler titiang nunas para pemandu wisata kaicen pewarah utawi piteket mangda prasida nabdabang para tamiune ring pamargi sane becik tur ngrajegang kesucian Pura inucap.
Wantah asapunika minakadi unek - unek ring manah sane prasida atur uningayang titiang majeng ring para pemimpin Bali warsa 2024. Inggih majeng ring para kanti, lan sameton titiang sinareng sami pamekas para sisya sane subaktinin titiang, ngiring ngawit mangkin dabdabang ragane maprekanti antuk tatujon sane prasida nincapang kelestarian seni lan budaya jagat Baline. Pinaka pamuput atur, titiang ngaturang suksma antuk uratian nyane. Tan lali titiang nunas geng rena sinampura manawita wenten atur titiang nenten menggah ring kayun. Pangaptin titiang dumogi malarapan antuk sasentokan puniki, prasida ngamolihang Ajeg Bali tur jagad gita. Om Santih Santih Santih Om.
Enable comment auto-refresher