Ngugu - Purwaka

Nyatua Bali “Ni Bawang teken Ni Kesuna”

Om Swastiastu. Tiang..titiang sareng timpal-timpal jagi…mangkin jagi ngaturang…jagi…satua “Ni Bawang teken Ni Kesuna”.

Katuturang satua anak makurenan, ngelah kone pianak luh-luh duang diri. Pianak ane kelihan madan Ni Bawang, ane cerikan madan Ni Kesuna. Akuren ngoyong kone di desane. Sawai-wai geginane tuah maburuh ka uma.

Pianake dua ento matungkasan pesan solahe, tan bina cara gumi teken langit. Solah Ni Bawang ajak Ni Kesuna matungkasan pesan, tan bina cara yeh masanding teken apine. Ni Bawang anak jemet, dueg magae nulungin reramane. Dueg masih ia ngraos, sing taen ne madan ngraos ane jelek-jelek. Jemet mlajah raga apa-apa ane dadi tugas dadi anak luh. Marengin meme magarapan di paon, matanding canang, sing taen lek teken ajah-ajahan agamane. Melenan pesan ngajak nyamane Ni Kesuna. Ni Kesuna anak bobab, males magae, dueg pesan ngae pisuna.Ento makrana memene setata ngugu pasadun Ni Kesuna, ane ngorahang Ni Bawang ngumbah di tukade, ngenemin anak truna.

Sedek dina anu, dugase ento, sujatine Ni Bawang mara suud nglesung padi, laut kayeh sambilang ngaba jun anggon ngalih yeh. Krana ngugu munyin Ni Kesuna, ditu Ni Bawang lantas tigitga, siama aji yeh anget tur tundena magedi.

Ni Bawang laut magedi sambilanga ngeling sigsigan. Disubane joh uling umah, neked kone ia di tukade, katemu ajak kedis crukcuk kuning. Ditu I kedis crukcuk kuninge kapiolas teken unduk Ni Bawange. Ni Bawang bekelang baanga mas-masan marupa pupuk, subeng, kalong, bungkung, gelang, muah kain sutra. Sing mungkin Ni Bawang ngelah panganggon ane melah-melah buka keto. Ia nongos di umah dadongne.

Sing taen ia mulih ka umah reramane. Kacrita jani Ni Kesuna kone nepukin mbokne, mapanganggo melah-melah. Laut ia nakonang uli dija maan panganggo buka keto. Disubane orahina teken Ni Bawang, ditu laut Ni Kesuna metu kenehne ane kaliwat loba. Dot ngelahang panganggo lan perhiasan ane bungah buka ane gelahang embokne. Krana ento lantas Ni Kesuna ngorahin memene nigtig ukudane apang kanti babak belur. Sasubane katigtig lantas ia ngeling sengu-sengu ka tukade, katemu teken I kedis crukcuk kuning.

Kacrita jani I crukcuk kuning nyotot ukudan Ni Kesunane isinine gumatat gumitit. Neked jumah ditu lantas gumatat gumitite ento ane nyanden Ni Kesuna kanti ngemasin mati. Keto suba upah anak mrekak. Setata demen misuna timpal, sinah mupunin phala karma ane tan rahayu. Teka goak nyrokcok uus, satua bawak suba suud.