Uling bulan November 2019 ane suba liwat gumine katiben pikobet gede. Virus corona utawi COVID-19, keto anake ngorahang. Nyumunin uling di China viruse ene simalu ada, ditu suba liu anake matianga teken viruse ene. Tusing ja di China dogenan, ane jani viruse ene suba malali ngiterin gumi, negara-negarane ane ada di gumine makejang suba kena, keto masi di Indonesia. Kasus kapertama virus corona di Indonesia nyumunin uling bulan Maret ngantos jani tonden ja suud-suud. Makejang daerah di Indonesia suba kena. Uling anak abesik, ne jani suba ngantos kuang lebih sia tali anake ane kena. Liu suba anake mati, liu masi anake ane suba seger. Bali ane taen orahanga kebal teken virus, ulian taksun tanah Baline kone luung pesan, tur anak Baline sabilang wai ngajeng basa gede ane dadi ngamatiang virus, ane jani suba liu masi ane kena virus corona. Ada ane maan lalahan uling anak-anake ane suba kena virus corona di luar negeri, ada masi ane malalah uling anake ane ada di Bali apabiin di desanne, ento madan transmisi lokal. Ento maciri yening manusane tusing ja ada ane kebal uling penyakit. Sujatinne, apa ke virus coronane ento? Virus corona ento tuah kluarga virus ane dadi idup di awak manusa lan beburon. Y ning di manusane, viruse ene dadi ngaenang makudang-kudang penyakit, uling penyakit ane umum sakadi paad, dekah, rangsek ngantos penyakit ane keras sakadi MERS Middle East Respiratory Syndrome lan SARS Severe Acute Respiratory Syndrome ane suba taen ngenain manusane dugas ipidan kanti ngaenang liu anake mati ulian penyakite ene. Panglalahan viruse ene enggal pesan, sakadi panglalahan penyakit influenza. Tuah uling ketelan cairan tubuh anake ane suba terinfeksi kala ia mabangkis utawi makokohan, suba dadi malalah ka anake lenan. Cairane ene dadi macelep uling di paningalan, cunguh lan bibih lantas cairan an misi viruse ene nyerang paru-paru. Ento makada yening anake kena virus coronane ene dadi likad maangkihan. Yening kekebalan tubuh anak ane kena viruse ene tusing kuat, ia lakar ngemasin sakit lan bisa masi ane ngemasin mati. Ulian viruse ene aluh pesan malalah, lan suba liu anake kena, ento makada pemerintah suba nyalanang makudang-kudang utsaha. Sakadi, ngorahin masyarakate apang nyaga kebersihan, stata nyaga jarak sosial, lan tusing dadi luas kija yening tusing ada keperluan ane mendesak pesan, yen kapaksa pesu patut nganggon masker. Ento makada uling sukat ada virus coronane ene, makejang anake magae uling jumah, maturan uling jumah, lan malajah masi uling jumah ulian makejang sekolah-sekolahe suba matutup. Keto masi hotel-hotel, restoran-restoran, lan jalan malali ane lenan milu masi matutup ulian suba tusing ada anake pesu malali. Makejang gegaene jemak uling jumah. Y n orahang med, pastika med anake ngoyong jumah dogenan. Sakewala anake jani suba pada kr atif. Liu ane banting setir, uling magae di pariwisata, ane jani suba liu liburanga ulian viruse ene, lantas ada ane mawali dadi petani mulih ka desanne, ada masi ane madagang jaja, canang, masker kain, lan apa ja ane dadi ngasilang pipis. Liunan anake madagang lewat online. Lenan teken ento, liu masi anake ane ngoyong jumahne malajah nyait canang lan ada masi ane malajah malebengan. Cara tiang, sukat ngoyong jumah dogenan, rasa med ento sai karasaang, apabiin yen tusing ada gae lan tusing ada tugas kuliah. Anggo ngilangang rasa mede ento, tiang sai malajah malebengan di paon. Uling semengan tiang suba ka paon, nganget yeh, nyakan lan ngae daran nasi. Suud keto, tiang demen nyobakin resep-resep masakan, utamanne jaja-jajan ane pabalih-pabalih tiang di Youtube. Yen nyak jaen, dikenkenne ento adep tiang anggo meli kuota intern t apang ada anggo modal kuliah online. Malebengan lan madaar suba anggon tiang hobi jani, lenan teken hobi nyait canang ane suba gelahang tiang uling cenik. Apabiin tiang ngoyong di desa, nu ngidaang ngalih nang don anti anggon jukut, sela kukus, lan paya anggon sambel. Makejang jinget alih di tegale langsung lebengin, ento makada stata saat keneh tiange madedaaran di jumah. Sabilang wai tiang malebengan, utamanne malebengan amik-amikan, ento makada jani baat awak tiange suba ngamenekang. Yen anake lenan biasane tusing demen baat awakne ngamenekang, kuala tiang demen pesan. Apa makada tiang demen? Uling pidan tiang sai nagih apang mokohan, da ja mokoh, apang misian bin bedik dogen tiang suba demen. Ene ulian tiang suba uling cenik berag. Kudiang tusing berag, tiang anak mula keturunan anak berag, bapan tiange berag tegeh, memen tiange berag endep, tusing mungkin tiang lekad dadi anak mokoh pesan. Uling cenik, liu timpal-timpale ane ngawalek tiang, oraanga tiang berig gidig, kurus kering, kerempeng, tulalit tulang kin kulit ulian saja tiang berag gati. Sesai tiang anggona kekedekan, kuala tiang tusing taen gedeg. Bisa ulian tusing taen gedeg ento, timpal-timpale ngansan demen nganggo tiang kekedekan. Tiang mula makenyem nampi walekan timpal-timpale buka keto ipidan, kuala di keneh tiange suba ada rasa jengah. Kanti tiang sai ngamikmik padidi, Nah, kedek ba malu, antosang gen bin pidan, yen tiang nyak misian. Kar antosang tiang masi, ane ngedek-ngedekang jani, buin pidan lakar ngorahang dot berag cara tiang, ulian ia mokohne overdosis. Beh, dong saja buka ane kenehang tiang. Timpal-timpal ane ngawalek-ngawalek tiang berag pidan ento jani awakne suba mokoh-mokoh gati, kanti ia sai ngorahang raganne padidi celeng. Di kenehe milu ja tiang kedek, kuala tusing ja ada keneh ngae ia kanti tersinggung ulian kedek tiange. Depang Widhine ane ngawales, keto dogen keneh tiang . Ane jani Widhine suba ngisinin keneh tiange, sukat libur coronane tiang suba nyak misian, pipine suba ngansan nembemang. Liu ane makesiab yen tumben-tumben nepukin tiang jani, nak pidan tiang berig gidig kone tulang kin kulit dogenan, ane jani suba cara jaja bakpao ane sai gae-gae tiang. Ne makejang ulian corona. Gegaene sesai malebengan, madaar lan masare ulian ngonyong dijumah dogenan. Makita dadinne tiang ngorahang suksma teken corona, ulian corona tiang suba mokohan. Kewala, eda nyen mara tiang demen, corona makelo ngoyong dini. Tiang nak jejeh masi. Suud ja monto ngajak perang. Padalem tiang dokter-doktere, perawat-perawate ane suba cara prajurit, kanti kenyel ngurusang anak sakit. K to masi pemerintahe, padalem tiang makelo ngurusang rakyatne ane pengkung-pengkung. Padalem masi murid-muride ane liu ngonyang pipis pamelin kuota internet ulian sabilang wai malajah online uli jumah. Keto masi anake ane tusing maan magae ulian karyawane liburanga lan tusing ada anak ngalih buruh masan jani. Nah, intinne makejang ngaba jele melah. Da ja iraga bes sebet teken kaadaane jani, percaya dogenan, badai pasti berlalu. Tetep tuutin arahan pemerintah apang ngoyong jumah malu, da kija-kija kanti coronane ilang, apang tusing iraga milu kena viruse ento. Gaenin apa ane tusing ngae raga med ngoyong jumah, apabiin bisa ngaenin ane ngidaang ngasilang pipis, payu anggo meli baas. Tetep nyaga kesehatan lan ingetang nunasica teken Hyang Widhi, dumogi pikobet puniki gelis ical. Rahayu
Enable comment auto-refresher