Luh Ayu Putu Olih: I Putu Supartika

Jam 9 semengan. Luh Ayu Putu, pianakné Pan Kembar semengan pesan suba nyetil. Mapenganggo bungah. Bajuné bawak, kantos ngenah pungsedné. Celanané bawak, ngédéngang paané ané putih, nuutang trénd jamané jani. Masandal tingklik ané tegehné petang sénti. Nganggon jam mérk terkenal, meranté cara ané anggona tekén artis-artisé di TV. Bibihné barak maénci, maané putih mapupur. Lima tengawané ngemel tablét, ajak dompét tebel, maimbuh ngaba tas méwah. Yén indayang jeg sakadi artis ibu kota ané lakar tampil di panggun penampilanné Luh Ayu Putu. Uli kamarné ia pesu, pejalané ngégol sambilanga gending-gending cara anak tusing kuangan buk. “Kija semengan Luh?” Pan Kembar matakén tekéning pianakné. “Lakar pesu melali ajak timpalé pa!” “Timpalé nyén ané lakar ajak melali? Awak luh, melahang anaké ngaba déwék, jaman jani jaman édan, pelih-pelih Luh matingkah, jelék lakar panadiané.” “Nah pa, tiang suba kelih, tiang nawang ané encén beneh lan ané encén pelih. Bapa sing perlu liu ngemaang tiang tutur,” kéto pasautné Luh Ayu Putu laut ia maklieng. “Anak bajang jaman jani, kéweh pesan nuturin. Pragat kitané adoka. Cek...cek...cek...cek...” Ngéncolang Luh Ayu Putu nyetater motor matic ané maparkir di gudangné. Lantas nabyeng ia pesu, magedi ka margané. Pan Kembar bengong ngatonang solah pianakné buka kéto. Bandingang idupé jani ngajak idupé pidan, mula saja mabinayan pesan. Yéning ipidan truna-truniné langah ané sliwar-sliwer di margané, nanging jani jeg liu pesan. Buina tusing ngitungang dina. Nyak semengan, tengai, peteng, rerainan gedé jeg patuh. “Ipidan truna-truniné tusing ada ané cara jani. Dimargané tusing ada truna-truni groang-groéng kaja kelod sing ada artiné. Ipidan makejang truna-truniné pada jemet nulungin rerama, nanging jani pragat suba nganggoang kita,” Pan Kembar ngerimik padidiana masambilan nyitsit slépan lakar baanga sampi. Saget uli duri maceplos Mén Kembar sahasa mamunyi. “Né suba pelih beliné. Beli tusing bisa nidik pianak. Jani kakéné suba dadiné pianaké. Nganggoang kita padidina, tusing dadi urus.” “Nguda Nyoman melihang beli? Sujatiné Nyoman ané pelih. Makejang ané tagiha tekén pianaké tuukin Nyoman. Nagih meli sepéda motor baru, meli tablét, meli HP, makejang isinin Nyoman. Uli pianaké mara menék bajang, Nyoman tusing taén ngurus pianak. Pianaké pesu semengan teka tengai, pesu tengai teka sanja jeg tusing taén urusang Nyoman. Pragat Nyoman setata iteh di paon kanti angus kaput andus jalikan.” “Pokokne beli ané pelih!” Mén Kembar maklieng ngalahin Pan Kembar ané enu iteh nyitsitang sampiné slépan.

Jam 2 tengai. Magruéng motor matic macelup ka umahné Pan Kembar. Luh Ayu Putu tuun uli sepeda motorné sambilanga nadtad beblanjan ané mewadah tas ané me-mérk toko terkenal. Mémé bapane keleh-keleh ningalin solah pianakné, nanging tusing masaut apa. Reramané tuah dadi penonton ané tusing nyidaang mamunyi apa di malun pianakné. Reramané tuah majugjag di durin pianakné, yéning suba ada pianakné makejang tusing pesu munyi. Luh Ayu Putu lantas macelup ka kamarné nadtad beblanjan. Ngeliwat di malun paningalan reramané. Tusing matolihan nang akijapan. Tusing macapatan tekén reramané nang abuku. Jeg nyerengseng ia majalan nuju kamarné. Kamarné tutupa. Apa kadén gaéna di kamarné, tusing ada ané nawang. Reramané masih tusing tau. Miriban ngitungan beblanjan ané mara belina. Mirib ia meli baju baru ané maal. Mirib ia meli pepayasan ané baru. Miriban ia nyobakin penganggoné ané mara belina sambilanga ungkat-ungkit di malun mekané mameka apang jegég. Pesu-pesu uli kamarné, Luh Ayu Putu negak di bataran umahné ngeluntik kuku. Di sampingné negak ia namping kuték warna-warni. Ada ané mawarna selem, bening, barak, miwah warna pink. Kéto masih patuh cara biasané, ia tusing taén engsap ngaba tablét ané maaji lima juta, ané mara belianga tekén reramané, ulian ngadep sampi. Sambilanga ngeluntik kuku, di kopingné masengseng héadsét. Sirahné anggut-anggut ningeh lagu. Sakéwala reramané negak pedaduanan saling endepin ngatonang soalah pianakné buka kakéto. Suud ngudik kuku, ia buin macelup ka kamarné. Uli tengah kamarné ia nélpun kisi-kisi. Bapané nyaru nyemak sampat ané maslédéhang di malun kamar pianakné sambilanga nguping munyin pianakné ané nélpun. Dingeha pianakné ngorahang sayang-sayang di telpuné. Bapané engsek, tur magedi ngejoh.

Jam 5 soréne. Pan Kembar iteh ngempug saang di natahne. Men Kembar masih iteh ngampilang saang ané empuga tekéning kurenané. Pianakné masih iteh mapayas mabélbél di kamarné tunggang-tungging di malun mekané. “Mé, dija pipisé ané di lacin lemariné?” Lu Ayu Putu makaukan jengat tekéning méméné. “Mémé tusing nawang Luh, mémé tusing maan nyemak pipis ditu, cobakin bapané takonin!” “Bapa tusing nawang apa Luh!” mesaut bapané sambilanga ngusapin peluh ané ngecah di tangkahné nganggo anduk ané kalunganga di baongné. “Setata kakéné, makejang tusing ada ngaku.” Luh Ayu Putu ngemétmét padidiana, sambilanga ngungkabin lacin lemari. Nanging ia tusing nepukin pipisé ané alihina. Tuah logaman dogen ané ada di laciné. Lantas pipis logamé ento duduka tur sambehanga di natahné. Méméné bengong ningalin pipis logamané sambeh di natahé. Pan Kembar masih milu bengong. Kandiké ané ada di limané ulung ka tanahé. Mén Kembar lantas nuduk pipisé ento saka kéténg tur kaputa aji bajuné. Luh Ayu Putu masebeng sinis nepukin méméné nuduk pipis logaman di natahé. Cara anak tusing taén malajahin tata krama, Luh Ayu Putu nyerengseng di malun reramané. Tusing metari, ia jeg nyetater motor laut magedi. Mara ilid bulun pianakné, Pan Kembar maakin kurenané, nulungin nuduk pipisé saka kéténg. “Kéné nasibé dadi rerama. Ngelah pianak Luh aukud misi ngéndah-ngéndah ngaba solah. Tusing taén ngajinin rerama. Tusing bisa ngasanin kénkén sakit reramané mapugling ngalih gaé. Meliang motor, meliang penganggo, maangin sangu. Jeg anggapa tusing ada iraga dadi rerama.” “Eda sangetanga ento bli. Depang dogén, kénkén ja kenehné. Masih mani puan ia ané lakar ngaba tusing ja i raga. Dadi anak tua, i raga jeg mendep dogén suba jani.” Ngetél yéh paningalané Mén Kembar, macampur ngajak peluhné ané nyerékcék. Usap-usapina yéh paningalané énto apang tusing tawanga tekén kurenané.

Jam 9 peteng Pan Kembar ngajak kurenané negak di bataran umahné ngantosang pianakné. Uli jam 7 ajaka dadua negak ditu ngantosang, nanging kondén masih ada tanda-tanda pianakné teka. “Suba jam 9 bli, nguda pianaké tusing teka?” “Beli tusing nawang Man!” “Kija ja lakuna piank i ragané? Duh Déwa Ratu icénin napi pianak tiangé kaslametan.” “Mirib ia nginep sek jumah timpalné. Suba peteng Man, jelék asane suba peteng enu di sisi, apa buin anginé dingin, bisa-bisa gelem dadine.” Pan Kembar ajaka kurenané macelup ka kamarné.

Kanti jam 11 peteng. Mén Kembar glibag-glibeg di pesaréané tusing nyidaang pules. Pan Kembar bengong ningalin langit-langit umahné. Cekcek di témboké masih milu bengong ngatonang anak luh muani pada resah ngantiang pianakné mulih. “Né pelih beliné, ané tusing bisa ngurus pianak!” saget Mén Kembar maceplos mamunyi. Cekceké ané bengong tan maa tengkejut tur mengkeb di balik bedégé. “Nguda Nyoman buin nyalahang beli. Unduké nénénan boya ja pelih beliné. Nanging né pelih i raga ajak dadua ané tusing bisa ngurus pianak.” “Yén pelih i raga ajak dadua, nguda beli tusing menahin kapelihan beliné?” “To nguda Nyoman masih tusing menahin kapelihan nyomané?” Pan Kembar ajaka Mén Kembar saling pakenyatin munyi di pasaréané. Miriban munyine ajaka dadua kadingehan neked di jumah sandingané. Nanging guminé suba peteng, miriban sandingané suba makejang pules. Sedeng iteha ajaka dadua majugjag, saget di natahné mamunyi motor métic magereng. “Nyén enta bli....?” “I Luh...!” Pan Kembar lan Mén Kembar lantas pesu. Tangkejut mémé bapane nepukin pianakne ngajak anak muani. “Luhhhhhhh.....!!!! Nyén to ajak Luh mai???” Luh Ayu Putu makipekan, muane baag biing. Amlapura-Singaraja, 14-17 Januari 2014