Mitra - Purwaka

Mitra

"Tok-tok! Bli sube ajam tengah di WC. Ape kepesuang? Emas ?" Keto sebilang wai Luh Ani megerengan ajak kurenane. Peteng lemah I Locong pragat ngudik HP. Uling teke megae kanti tengah lemeng HPne tusing taen mepejang. Semengan ne jani Luh Ani lakar pesu meblanje. "Bli, tiang ngidih pis lakar anggo meli darang nasi," "Neh pipis enem dasa tali," "Mih, adi tumben polos pipis beline pesu. Maan bonus beli uling pak bos ae? Lakar anggon meli be nah bli, makelosam iraga tusing naar be," "Dingehang malu beli, ne dasa tali ne anggon meli darang nasi, kanggoang tahu tempe ken gerang gen be jaen," "Men ane seket ne anggon ape? " "Nitip beli kuota luh nah," " Mimih dewa ratu,"

Galahe sube tengai, Luh Ani iteh bincuh nyemak gae. Mebading ajak gaene I Locong ane iteh glayah-glayah ngudik HP. "Bli, dong dadi ati bli kaketo buka wai. Tingalin je kurenane kapah-kapah. Ajak ngorte kurenane. Yan metakon ape dadi tulungin kenken. Ento tolih bin puan lakar odalan sanggah. Tiang nu ngekanang banten. Bli maleh-eleh ape malu ngayah di sanggah," "Eh, ape tawang nyai luh. Bli butuh masi ngibur nawang. Kaden nyai sing kenjel megae ngalih pipih. Nyai batas nyemak gegaen jumah dogen. Sing misi ngitungang pipis. Sube perahe to nawang. Ene sube nyak beli jumah ngoyong. Kalingan care pisagane pragat disisi ngalih mitra," "Mih beli, sing je melenan beli ajak pisagane ento. Goban mitrane gen melenan. Pisagane ento jeleme. Beli barang bangke, Hpne ento. Sekate ade HPne ento sube, beli sing ngelah waktu. Kalingan lakar nulungin kurnan, ngorte ajak tiang gen bli kapah iseng. Pipise sube kemu lakune doen,"

Kacrita galahe sube sanja. I Locong lakar mandus sambilange mesakit basang. Patuh care ibi puan Hpne tusing mepejang. Iteh mapanjer di malu matane. Gedebwag! "Luh... Tulung luh !," Dingehe munyine Locong kauk-kauk uling WC. Melaib encol Luh Ani. Nogdog lantas Laut. "Bli, kenape bli? Ulung bli ae? Nang bukakang malu jelanane bli,"! Keto luh ani mamunyi sambilange sigsigan, nyeh teken unduk kurnane kenape-kenape "Luh...HP beline mecelempung ke song WC luh. Kenkenang nyemak ne Luh," Luh Ani tusing mesaut. Tuah ngedek ngikik.

Tusing care ibi puan. Jani bengang bengong I Locong. Tepunike kurnane sing ngoyong-ngoyong. Paekine lantas Luh Ani. "Luh suud je monto nyemak gae. Ajak je bli ngorte. Inguh san kene ngoyong," "Bli lakar ngorte? To pantingane malu ajak ngorte. Gaen tiange enu liu,"

Ane jani galae sube peteng. Luh Ani sube ngebah malunan. Nyagjag lantas ngengalang I Locong ngebah di samping luh Ani. Laut ngelut Luh Ani. "luh ujan-ujan kene ngujang luungne?," "Bli, undebang ke malu jelane nake," Ngengalang I Locong Bangun ngundebang jelanan, laut ngematiang lampu. "Eh, bli, tusing je uling tengah. Undebang jelanane uling sisi," "Terus ngengken men bli luh?" "Kemu ke WC lakun. Song WCne seluk, aliin mitrane beline ajak pules!"

Yunda Ariesta