Ki Balian Batur, Siat Peteng
Summary
In English
In Balinese
Ngancan liu krama Desa Cau ngemasin mati. Tangis tan papegatan ulian kilangan pianak muang rerama. Penglingsir Desa Cau kairing prajuru desa ayat tangkil ka Puri Kawyapura. Nguningang Desa Cai gerubug ring Ida Cokorda Sakti Blambangan. Ida Cokorda Sakti Blambangan kroda mirengang atur penglingsir Desa Caune. Sungsut manah Ida Sang Prabu riantukan akeh panjak idane ngemasin mati sangkaning kasaktian Ki Balian Batur lan sisian-sisianne. Ih Ki Balian Batur, cangkah cumangkah cai di panegeran gelahe. Yen buka kene unduke, satmaka cai ngejotang bangke ka Kawyapura. Panjak gelah ajak makejang, lan rejek Ki Balian Batur, matiang kayang kulawargane. Rejek asapunika titah Ida Cokorda Sakti Blambangan. Risampune panglingsir Desa Cau kasarengin prajuru desane mapamit saking puri, Ida Cokorda Sakti Blambangan pramangkin mulisah. Santukan Ida mikayunin Ki Balian Batur sane kalintang sakti mawisesa. Ri kala Ida mulisah, De Bendesa raris tangkil. Garjita pisan kayun Ida Sang Nata santukan tabeng wijang sane pinih andel sampun tangkil ka bale paseban. De Bendesa, tabeng wijang ane andelang manira, kema cai luas ke Karang Kedangkan, matiang Ki Balian Batur, asapunika titah Ida Cokorda Sakti Blambangan. Semengan, De Bendesa kairing balawadwa Puri Kawyapura lunga ka Karang Kedangkan pacang ngebug Ki Balian Batur lan sisia-sisiane di Banjar Celedu Nginyah. Nyaluk peteng balawadya ane ngelah kawisesan pacang magegebug. Makejang mabekel sesabukan lan pasikepan. Sangkaning kasaktianne, Ki Balian Batur suba nawang yening tabeng wijang Puri Kawyapura pacang megegebug ke Karang Kedangkan. Ki Balian Batur nitahang para sisyane yatna-yatna, macadeng di tanggung Desa Karang Kedangkan. Makejang sregep kesaktian pacang ngarepang balawadya Puri Kawyapura ane pacang ngebug Banjar Celedu Nginyah. Para sisyan Ki Balian Batur masang panyengker apang musuhe tusing nyidang ke Banjar Celedu Nginyah. Nyaluk peteng, balawadwa Puri Kawyapura teked di tanggun Desa Karang Kedangkan. Ipun makasami ngelarang kawisesan pacang nyentokang kasaktian Ki Balian Batur lan sisyan-sisyanne ane suba sayaga ngantosang di tanggun desa. Api amun guwungan siape pada mekeber saling pagutin. Tabeng wijang Puri Kawyapura kalah. Ipun malaib saling langkungin kerana jerih. Para sisya Ki Balian Batur kedek ngakak nyidang ngalahang tabeng wijang Puri Kawyapura. Hahahahah, mai mai liakkkkkkkkkkk
In Indonesian
Enable comment auto-refresher