Bladbadan - Purwaka

Asiah lan Yanto mare lima bulan merantau ka Karangasem. Mebekel wanen, idup padadianan di gumi Karangasem. Lepet, mare abulan dadi buruh kajang bias, ia sube nganggur buin, galiane tutup Gunung Agung kone lakar meletus. Sube ulung buinan teteh jan, keto bladbadane nyambatang. Yanto lan kurenane kene pengarah ngungsi teken pemerintah, sawireh tongosne ngoyong kene ane madan kawasan rawan bencana III. Tusing ngelah nyame, tusing ade kenal nyen, lakar mulih ke kampung tusing ngelah pipis. Bayune sube ngetor, takut bani mejalan ngungsi. Inget teken undukne madan "minoritas", buine sada mabasa Bali tusing bise.

Kacritayang jani, suba ked di pengungsian. Mamunyi kletit kletit hapene Yanto maciri galah Sholat Magrib. Inguh keneh Yanto ajak I Asiah, mekeengan dije lakun sembahyang. Makejang anake pada pesliwer. Tepukine lantas anak mabaju misi tulisan "relawan".

Encol Yanto makaukan "Pak relawan, pak relawan"

"Inggih punapi bapak?"

"Maaf saya tidak mengerti Bahasa Bali. Saya mau tanya dimana ada tempat sholat ya?"

I Relawan tuah maanggutan, lantas melaib kemu mai ngaukin timpal. Sebet pesan bayune i Yanto, nyesel merase nyesel merantau ke Karangasem. Merasa mebinaan maan parilaksana. Mebalik ia lantas ngojog kurenane. Konden menjekan pejalane Yanto, saget sube kaukine buin jak I Relawan.

"Pak pak, maaf ya,.."

Konden telah munyin relawane i yanto sube nyelag masaut, "Ia pak, tidak apa-apa" laut megedi.

"Oh baik pak. Tempatnya ada di belakang ya pak, sudah kami siapkan,"

Ningeh ento i Yanto paketeltel ngeling. Yadiastun ia pendatang, i relawan tusing mabinaan. Lega pesan bayune Yanto lan Asiah jani. Jani nau sajan Ia ditu, melajah basa lan budaya Bali, liu ngelah timpal, liang kenehne.

(Yunda Ariesta)