Magerengan - Purwaka

Galahe sube jam dasa lebih seprapat peteng, munyin motor magerengan macelep mulihan. Encol Men Budi nyeeb jendela. Tepukine lantas i De Budi tuun uling sepeda motor. "Meme adi konden mesare? Kaden buin mani ngorahang sing medagang, adi buin metanding canang?" "Tusing lakar adep, kal angon meme merainan ngatag mani. Yadiastun irage tuah ngelah punyan tabia, kal atagin masi matur suksma sareng Ida" "Oh keto, me mare teke uling kampus yang singgah di toko buku. Ade buku ne demenin yang me. Dadi yang nyidih tabungan memene aji seket tali piah gen me?" "Durinan meli de nah, pis tabungan memene sube telah anggon merainan," I De Budi tusing mesaut, ngembrosang mulian ke kamarne. Men budi lantas ke pawon, nyemak piring, misi nasi jukut kelor mesambel grago. "De, medaar malu," De Budi nyeledetin piring, laut mesaut. "Kene sube, irage lacur ulian merainan. Sube orain yang, mantra doen cukup, meme ajakin modern sing nyak. Sai-sai tuah naar grago. Ngelah pipis abedik, sube anggon merainan. Ben pidan irage ngidaang menain umah," Ningeh ento memene tuah mekenyem sambilange nyedogang piring. "Kene De. Meagame ento liu jalanne. Beneh saje ne oraang made, ade jalan meagame tuah ngangon mantra. Jani meme metakon, ane ngidupin irage ape? Kaden ulian meme medagang canang?" "Ae, men kenken?" "Yening, mekejang ane oraang De berpikir modern ento, meme sube sing ngelah penghasilan, sing keto?" "Gegaen len alih me, aluh to!" "Tusing je keto suksmane de. Tusing je ade yadnya ane memiskinkan. Tungkalikne, ento ane ngaenang irage di Bali pade ngelah pangupa jiwa. Uling anak tuah tamat SD, dadong-dadong ngelah pangupa jiwa madagang sarane banten. Pipise tusing je anggon maseneng-seneng pedidi dogen, irage meyadnya masi teken semeton ane membutuhkan," Judul : Lacur ulian meyadnya?

Olih : Desak Made Yunda Ariesta