How to reduce plastic waste from religious ceremonies? Post your comments here or propose a question.

Kebus - Purwaka

Sube duang wai Men Tami gelem kebus dingin. Diapin kebus ngilgilang, ia tusing ngoyong- ngoyong. Nyemak gegaen pawon, nyait anggon merainan lan sambilange meburuh ka umane. Yadistun sube ngelah panak bajang, tusing ja dadi andelang. Kaling lakar nulungin gegaen memene, manting pangango pedidi tusing pelut. I Tami, gegaene tuah mecik HP. Masekeb di tengah kamare. "Mi, sube masuk SMA, nyai konden masi nyak manting pedidi? De je lakar melajah nyakan, marengin meme ngalih gae, irage sube tusing ngelah nyen kekene. Manting dogen nyai sing pelut. Seneb-seneb kanti basang meme nyemak gae kekene. Nyai wak dadi nak eluh, melajah nyakan, nyemak gae, pang sing adan meme mesabat dipisage orange sing taen ngurukang nyai!" "Nah, sabar malu me. Yang nu sibuk ngae PR nawang," "Ngae PR? Uling kedat kanti peteng gegaen nyaine tuah nolih HP. PR ape kapragatang?" "Nak makejang dadi gae di HPne ni, me! Yang masi sing perlu melajah nyakan lan ngae ape-ape ajak meme. Mekejang sube ade di HPne. Ane jani suud monto uyut me, mai pecikine malu pang luungan bayun memene," Lege bayune Men Tami. Merasa tuturne karesepang olih I Tami. Encol Men Tami melaib ke meten, ngebah ditu ia di plangkane. "Mai nake Mi, Payu pecikin meme?" "Antiang kesep me, nu nyemak HP!" Melaib lantas i Tami ngojog memene. Kenebotne nyemak lengis uap-uapange di tundun memene. Limane ne kenawang buin abesik manjer HP, sambilange mamunyi. "Lagi pijat Mama yang lagi sakit nih, GWS ya mama aku," . Suud keto kirime rekamane ento ke snapgram. "Ape gae nyai to mi?" "Mendep gen meme, urusan anak muda ne, amonto gen malu me nah yang ngae PR malu buin," "Mimih, mare nguapin lengis gen nyai sube melaib,"

Kacrite galahe sube sanje. I Tami nu masi iteh mecik HP. Memene srayang sruyung laut meglebug di pawon. "Gedebug," "Me, ape to ulung me?," Sawireh tusing ade anak mesaut. I Tami nelok pesu. Mekesiab ia nepukin memene nyelempoh di ubeg-ubeg kori pawone. Ngeling paslegut, tulung-tulung ngaukin pisage. Lantas rame anake teke. Memene surunge plaibange ke RSUD. Sawireh kena penyakit ane madan Tifus, i Men Tami Ngamar di RSUD. "Mi, mulih be nyai malu mu, delokin umahe. Ne meme ngelah sisan pipis aji 20 tali. Anggon meli darang nasi malu nah," Encol I tami mulih. Neked jumah inguh bayune nepukin pantingan medugdug. Laut nyemak tas kresek, celepange makejang, lantas abane ke tukang laundry. Jani ngojog ia ka pawon, basangne sube seduk. Lakar meli nasi, pipisne sube telah mayah laundry. Lakar nyakan tusing bisa. Mekeneh i Tami, laut nyemak Hp "Oke google cara memasak nasi" Hpne lantas mamunyi "Tetot! Misi tulisan "Tidak Bisa Membuka Halaman" lan ada SMS masuk "Sisa kuota anda 0" "Meme, mekente yang me!" Judul : Tami : Oke Google Jani Yang Makente Olih : Desak Made Yunda Ariesta